Ana kuy màggal Buur Yàlla?
24
1 Ñeel Daawuda, di kàddug Sabóor.
Aji Sax jee moom suuf ak li ko fees,
ak àddina ak li ci biiram.
2 Moo samp suuf biir géej,
dëj ko ci kaw wal mi.
3 Ana kuy yéegi tundu Aji Sax ji,
kuy taxawi bérabam bu sell ba?
4 Xanaa ku mucc ayib, sell ab xol,
xemmemul caaxaani neen,
du giñey fen.
5 Kookooy jagoo barkeb Aji Sax ji,
ak njekku Yàlla, mi koy musal.
6 Ñooñooy waa làng, gi lay sàkku,
di maasug Yanqóoba, giy sàkku sa yiw. Selaw.
7 Neleen bunt yi kulbét,
ubbileen bunti cosaan yi,
Buur Boroom ndam duggsi.
8 Buur Boroom ndam booboo di kan?
Xanaa Aji Sax ji Boroom dooleek njàmbaar,
Aji Sax ji jàmbaaru xare ji.
9 Neleen bunt yi kulbét,
ubbileen bunti cosaan yi,
Buur Boroom ndam duggsi.
10 Buur Boroom ndam booboo di kan?
Xanaa Aji Sax ju gàngoor yi.
Kookooy Buur Boroom ndam. Selaw.